МЭНДЧИЛГЭЭ

                      Хутагтуудын өлгий нутаг Хөвсгөлчүүд бидний хувьд улиран өнгөрч буй 2022 он ажил хөдөлмөрийн арвин амжилт дагуулсан жил боллоо.

Сумын Засаг даргын “Хөгжлийн төлөө хамтдаа” 2020-2024 оны үйл ажиллагааны хөтөлбөрийг хэрэгжүүлэхээр бүхий л талт бодлогыг барин ажиллаа. Үүнээс дурьдвал Аймгийн төсвийн хөрөнгө оруулалтаар Төвлөрсөн шугам сүлжээ болон барилга байгууламжийн ажлыг 3,9 тэрбум төгрөгөөр бүрэн ашиглалтад хүлээн авсан. Ингэснээр анх удаа 2,9 мегаваттын хүчин чадалтай төвлөрсөн уурын зуух, 100 тонны багтаамжтай сумын нэгдсэн усан сан, цэвэр, дулаан, бохирын шугам сүлжээний ажил хийгдэн төсөвт байгууллагууд инженерийн шугам сүлжээнд холбогдсон. Цаашдаа айл өрхүүд цэвэр, бохир, халаалтын төвлөрсөн шугамд холбогдох нөхцөл бий болж байгаа юм. Төсөвт байгууллагуудын дотор шугам сүлжээг шинэчилсэн, Ухаалаг худаг байгуулагдсан, 240 хүүхдийн хичээлийн байрны дээврийн засварын ажил, Ерөнхий боловсролын сургуулийн ариун цэврийн иж бүрэн байгууламж хийх, 4G сүлжээг Элст болон Чулуут багийн баруун хэсгээр нэвтрүүлсэн, Халуун усны газар ашиглалтад орсон, Малын ванныг Элст болон Чулуут багт барьсан гэх зэрэг өрнүүн их бүтээн байгуулалт хийгдсэн байна.

                  Шатрын спортоор ази тивийн аваргын хүрэл цом, хүрэл медальтан Э.Болортунгалаг төрсөн нь бахархууштай.

                  Малын тоо толгой 208918 болж мал сүрэг таван төрлөөрөө 11 хувиар өссөн байгаа нь малчид, ард иргэд та бүхний минь хичээл зүтгэл, хөдөлмөрийн үр шим билээ.

                  Мөн 2022 онд “Чандмань илч” ОНӨХК-ний салбар байгууллага үүсэн байгуулагдаж аж ахуй нэгж нэгээр бүл нэмснийг цохон тэмдэглүүштэй.

Угтах ондоо бүтээлээр дүүрэн

Урам тэтгэсэн амжилтаар баян

Гэгээн гэрлээр гэр тань гийж

Гэрэлт оюунаар ухаан тань тэлж

Ирж буй 2023 ондоо одтой, азтай, хийморьтой явахыг хүсэн ерөөе.